Працаваць ад расы да расы…

Беларускі народ з даўніх часоў шанаваў маці-зямельку, ласкава называў яе карміліцай.
Хто, як не яна, аддзячыць селяніну за сумленную і плённую працу?..

У ААТ «Вядрэнскае-Агра», як і ў іншых гаспадарках раёна, правялі «Зажынкі». На полі каля вёскі Вяжоўка ў пачатку мінулага тыдня сабраліся камбайнеры, памочнікі, спецыялісты акцыянернага таварыства, а таксама культработнікі, прадстаўнікі духавенства, госці. Свята атрымалася на славу.
Начальнік райсельгасхарчу Міхаіл Мільчанін пажадаў поспехаў працаўнікам і адзначыў: «Зараз вы, механізатары, галоўныя героі дня. Ураджай вырасцілі нядрэнны. Трэба правесці ўборку збожжавых у кароткія тэрміны. За арганізацыю працэса адказвае кіраўнік гаспадаркі. Для хлебаробаў павінны быць створаны найлепшыя ўмовы».
Старшыня ААТ «Вядрэнскае-Агра» Уладзімір Пушноў прыняў сімвалічны першы сноп. Святар айцец Сергій прачытаў малітву.
Галоўныя ж удзельнікі свята —хлебаробы. Зараз менавіта ад іх залежыць, як хутка будзе ўбраны ўраджай. У акцыянерным таварыстве да важнай кампаніі падрыхтаваліся. Што прыемна, абмалочваць шчодрыя нівы будуць не толькі вопытныя механізатары. Маладзёжны экіпаж у складзе Сяргея Маталыгіна і Аляксея Аўсянкі таксама маюць намер дамагчыся высокіх паказчыкаў. За першыя некалькі дзён жніва яны ўжо паспелі нядрэнна праявіць сябе.
— Для нас усё ўпершыню, — падзяліліся камбайнер і памочнік. — Дагэтуль не прымалі ўдзелу ва ўборцы збожжавых. Тым не меньш будзем імкнуцца не адставаць ад старэйшых таварышаў. Калі што, яны заўсёды дапамогуць і словам, і справай.
Сяргей і Аляксей самі да сябе вельмі патрабавальныя. Ніякіх скідак на ўзрост рабіць не збіраюцца. Хлопцы разумеюць, што некалькі бліжэйшых тыдняў прыйдзецца рупліва працаваць. Як кажуць у народзе, ад расы да расы…
ААТ «Вядрэнскае-Агра» мае адну з найвялікшых у раёне плошчаў, адведзеных пад збожжавыя. Неабходна абмалаціць звыш 1700 гектараў. Задачы сур’ёзныя. Трэба іх выконваць.

Юрый АЛЕКСАНДРОВІЧ.

Добавить комментарий

Ваш e-mail не будет опубликован.