«Да людзей трэба прыслухоўвацца…»

Яшчэ нядаўна жыхар вёскі Латыгалічы Леанід Наталевіч працаваў сувязістам. Шмат гадоў аддаў пачэснай справе электраманцёра. Па рабоце амаль кожны дзень наведваўся да вяскоўцаў. Выконваў заяўкі ад насельніцтва і адначасова атрымліваў даручэнні ўжо як дэпутат Красналуцкага сельскага Савета дэпутатаў. Было вельмі зручна, прызнаецца Леанід Сямёнавіч.

Леанід Наталевіч — дэпутат са стажам.

— Сумяшчаў службовыя абавязкі і грамадскія, — усміхаецца народны выбраннік. — Заўсёды быў у курсе ўсіх спраў. Зараз перайшоў на іншую работу. Так часта заходзіць у госці да вяскоўцаў не выпадае. Аднак ёсць тэлефоны, іншыя сродкі сувязі. Калі трэба вырашыць нейкую праблему, заўсёды гатовы дапамагчы. Людзей неабходна слухаць.
Леанід Наталевіч — дэпутат са стажам. Чацвёрты тэрмін у якасці народнага выбранніка. Кожны раз жыхары вёсак Багданава і Руднае, а таксама часткі Латыгаліч аказваюць давер свайму прадстаўніку. Гэта накладвае пэўныя абавязкі. Імкнецца Леанід Сямёнавіч давер народны апраўдаць.
Трэба вось дадатковыя кантэйнеры для смецця па вуліцы Цэнтральнай у Латыгалічах устанавіць. Дэпутат выходзіць на камунальную службу Новалукомля. УНП ЖКГ «Камунальнік» на просьбу рэагуе. Кіраўніцтва прадпрыемства абяцае ў хуткім часе пытанне вырашыць. Зараз збору другасных матэрыяльных рэсурсаў надаецца вялікая ўвага. Вёскам нельга адставаць. У Багданаве і Рудным кантэйнеры не ўстанаўлівалі. Туды ездзіць смеццявоз. Абслугоў-вае вяскоўцаў па графіку. Нараканняў няма.
— Людзі становяцца больш культурнымі, — лічыць дэпутат. — Добрая тэндэнцыя. У летні сезон гул трымера кожны дзень можна пачуць. Стала модным займацца касьбой на прыдамавой тэрыторыі. Раней пра гэта сяляне так не клапаціліся. А зараз па некалькі разоў за лета абкошваюць. Вядома, ёсць праблемныя адрасы. Аднак пазітыўных прыкладаў куды больш.
Добраўпарадкаванне населеных пунктаў — задача найважнейшая. І дэпутацкі корпус павінен дапамагаць у гэтай справе. Таксама на кантролі — якаснае водазабеспячэнне насельніцтва. У Латыгалічах, Рудным, Багданаве калонкі працуюць. З прадстаўнікамі «Водаканала» Леанід Наталевіч асабіста трымае кантакт. Калі ўзнікае пэўная праблема, яна аператыўна вырашаецца. Тое ж тычыцца і іншых пытанняў.
— На маім выбарчым ўчастку пражываюць некалькі дзясяткаў чалавек, — дзеліцца Леанід Сямёнавіч. — І перад кожным я ў адказе. Добра гэта разумею. Раблю ўсё магчымае, каб была карысць.
Сам дэпутат нара-дзіўся і вырас у Латыгалічах. І жыве дагэтуль у бацькоўскай хаце. Быў перыяд, калі падаўся ў горад. Працаваў у Барысаве. Потым вярнуўся дадому. У вёсцы, пры-знаецца, яму лепш дыхаецца. Тут усё роднае і знаёмае. Тут карані. Нарэшце, тут людзі, якіх ён добра ведае і разумее. І якім усім сэрцам жадае дапамагчы.

Юрый АЛЕКСАНДРОВІЧ.

 

Добавить комментарий

Ваш e-mail не будет опубликован. Обязательные поля помечены *